Пытанне змены пакаленняў у палітыцы падняў Аляксандр Лукашэнка 13 лютага на сустрэчы з генеральным сакратаром Арганізацыі Дамовы аб калектыўнай бяспецы Імангалі Тасмагамбетавым.
У размове з генеральным сакратаром АДКБ Лукашэнка падкрэсліў багаты палітычны досвед суразмоўцы.
— У маладосці мы з вамі і ў камсамоле працавалі. Вы прайшлі вельмі сур’ёзны шлях, які заслугоўвае павагі. Цяпер людзей, якія маюць такі досвед з савецкіх часоў (па-рознаму можам ацэньваць гэты перыяд), няшмат, і яны вельмі каштоўныя. Таму я думаю, што гэты ваш досвед, і на дыпламатычнай у тым ліку рабоце, нам спатрэбіцца. Асабліва сёлета, у час старшынства Беларусі. Ды і на наступныя гады вашай працы ў АДКБ. Не толькі спатрэбіцца — ён будзе запатрабаваны вельмі сур’ёзна, — сказаў Аляксандр Лукашэнка.
Ён адзначыў, што «такі досвед вельмі каштоўны, бо маладому пакаленню неабходна яго перадаваць».
— Я часта ў Беларусі кажу. Казахстан ужо непасрэдна гэта перажывае — змену пакаленняў у палітыцы. Часта гэта праходзіць небязбольна. Хацелася б, каб гэта прайшло бязбольна. І ў нас, і ў вас. Можа, нешта скажаце пра Казахстан у другой частцы (сустрэчы — Заўв. Рэд.), — папрасіў Тасмагамбетава Лукашэнка.
Нагадаем, пасля студзеньскіх падзей 2022 года, калі ў Казахстане ўспыхнулі беспарадкі, сваякі першага прэзідэнта Казахстана Нурсултана Назарбаева страцілі высокія пасады, некаторыя члены яго сям'і сталі фігурантамі крымінальных справаў.
Акрамя гэтага, у новай рэдакцыі Канстытуцыі Казахстана прыбралі згадку «першага прэзідэнта», «заснавальніка незалежнага Казахстана», тытула Елбасы і спасылку на асноўны закон пра яго прывілеі.
Сталіцу Казахстана з Нур-Султана перайменавалі назад у Астану. А дзень Першага Прэзідэнта прыраўнялі да прафесійных святаў, пазбавіўшы статусу дзяржаўнага.
У студзені 2023 года Канстытуцыйны суд (КС) Казахстана прызнаў, што закон «Аб Першым Прэзідэнце Рэспублікі Казахстан — Елбасы» страчвае сілу.
У кастрычніку 2022 года Аляксандр Лукашэнка падчас візіту ў Астану сустрэўся з Нурсултанам Назарбаевым. На апублікаваным у сеціве фрагменце іх размовы палітыкі паспрачаліся пра тое, што можна лічыць старасцю.
