Былы прэзідэнт ЗША Дональд Трамп 31 ліпеня заявіў, што ягоная суперніца ад Дэмакратычнай партыі на выбарах 2024 года, віцэ-прэзідэнтка Камала Харыс, «раптам стала чарнаскурай» некалькі гадоў таму. Трамп абвінаваціў Харыс у тым, што «яна раптам змяніла» сваю ідэнтычнасць, паведамляе тэлеканал CNN.
Яго каментары з гэтай нагоды прагучалі на сходзе Нацыянальнай асацыяцыі цемнаскурых журналістаў у Чыкага. Трамп заявіў, што Харыс «заўсёды была індыйскага паходжання і прасоўвала індыйскую спадчыну».
— Я не ведаў, што яна чорная, пакуль некалькі гадоў таму яна раптам не стала чорнай, і цяпер яна хоча, каб яе называлі чорнай, — сказаў Трамп, дадаўшы, што «хтосьці мусіць гэтым заняцца».
Пазней у той жа дзень, выступаючы ў Х’юстане на сходзе афраамерыканскага жаночага таварыства Sigma Gamma Rho, Харыс адказала Трампу, ахарактарызаваўшы яго каментары як «тое самае старое шоу: разлад і непавагу».
— Дазвольце мне сказаць, што амерыканскі народ заслугоўвае лепшага, — спакойна адрэагавала на выказванні Трампа Харыс.
Тэлеканал адзначае, што цяперашнія каментары Трампа нагадваюць яго аналагічныя нападкі на цемнаскурых палітычных супернікаў у мінулым, уключаючы гады, калі ён распаўсюджваў ілжывую расісцкую тэорыю змовы пра месца нараджэння былога прэзідэнта ЗША Барака Абамы. Трамп сцвярджаў, што Абама нарадзіўся не ў Злучаных Штатах, таму не можа вылучацца ў прэзідэнты.
Таксама адзначаецца, што маці Камалы Харыс была індыянкай, а бацька — з Ямайкі. Абое мігравалі ў ЗША. Харыс нарадзілася ў Оклендзе ў амерыканскім штаце Каліфорнія і вучылася ў прыватным універсітэце Howard University ў Вашынгтоне.