Сітуацыя на палях і ў гаспадарках далёкая ад ідэальнай, заявіў Аляксандр Лукашэнка на селектарнай нарадзе па пытаннях уборачнай кампаніі, паведамляе яго прэс-служба.
«Вернемся да нашых палёў. Як мне дакладваюць Камітэт дзяржкантролю, Генеральная пракуратура, Міністэрства ўнутраных справаў, сітуацыя далёкая не тое што ад ідэальнай — ад нармальнай», — сказаў Лукашэнка.
Асноўныя прэтэнзіі кантралёраў — нізкая гатоўнасць збожжаўборачнай тэхнікі, элеватараў, сховішчаў і праблемы з механізатарскімі кадрамі. Паводле Лукашэнкі, камбайны не гатовыя да працы практычна ў кожнай другой з правераных гаспадарак. Пры гэтым у асобных арганізацыях да рамонту нават не прыступалі.
«Зноў жа адвечная хвароба аграрыяў — прыпіскі. Па рэспубліцы пракуратура выявіла 185 такіх выпадкаў, калі тэхніка была гатовая да працы толькі на паперы. Вось гэтага дараваць ніколі нельга! 33 зернеачышчальна-сушыльныя комплексы таксама былі не гатовыя», — адзначыў палітык.
Больш за ўсё такіх абуральных фактаў выявілі ў Мінскай (77), Гродзенскай (52) і Віцебскай абласцях (42). «Не ведаю, навошта гэтае круцельства і каго вы спрабуеце падмануць? Замест таго, каб звярнуцца па дапамогу, спрабуеце схаваць праблему. А ў выніку будзе непрыбраны ўраджай і страты для ўсёй дзяржавы», — дадаў Лукашэнка.
Яшчэ адной сістэмнай праблемай ён назваў адсутнасць тэхагляду. Да пачатку ўборачных работ яго не прайшлі ў Гомельскай вобласці 63% камбайнаў, Віцебскай — 59%, Магілёўскай — 36%.
«Нядзіўна, што потым нагрузка на адзін камбайн, які працуе, складае не 273, як у сярэднім па краіне, а звыш 500 гектараў, а ў некаторых і 900 (асобныя гаспадаркі Барысаўскага раёна). Пра якую якасць уборкі тады мы можам гаварыць? А год таму было дадзенае даручэнне закупіць для ўсіх рэгіёнаў каля 600 новых збожжаўборачных камбайнаў. Больш за тое, была выпрацаваная і ўхваленая аптымальная схема іх закупкі. Рашэнне прынятае, але ўсе губернатары крыўдзяцца: на 17 ліпеня вяскоўцы атрымалі толькі 425 адзінак тэхнікі. Час ужо пераходзіць ад балбатні да канкрэтных мераў», — запатрабаваў палітык.
Пры гэтым Лукашэнка адзначыў, што жніво толькі пачалося, а Камітэт дзяржаўнага кантролю ўжо выявіў факты няякаснай уборкі ўраджаю і наплявальніцкага стаўлення да яго захаванасці.