Група амерыканскіх навукоўцаў параўнала розныя віды псіхаактыўных рэчываў — ад алкаголю і нікаціну да наркатычных сродкаў і медыцынскіх прэпаратаў — з пункту гледжання колькасці спробаў адмовіцца ад іх, якія людзі робяць, перш чым удаецца дабіцца ўстойлівага ўстрымання. Веды пра тое, якія з прыхільнасцяў часцей суправаджаюцца рэцыдывамі, а значыць, патрабуюць вялікіх намаганняў для пераадолення, важныя спецыялістам, што лечаць такія залежнасці, піша Naked Science.
Для даследавання, артыкул пра які выйшаў у часопісе Drug and Alcohol Dependence, прыцягнулі ўдзельнікаў праекта International Quit and Recovery Registry (IQRR). Ён аб’ядноўвае людзей, старэйшых за 18 гадоў, з разладамі, звязанымі з ужываннем псіхаактыўных рэчываў, якія змагаюцца з залежнасцю і гатовыя дзяліцца з навукоўцамі досведам і думкамі з гэтай нагоды.
У фінальную выбарку ўвайшлі 344 чалавекі, якія прайшлі анкетаванне наконт псіхаактыўных рэчываў і досведу іх ужывання. Удзельнікі, у прыватнасці, паведамілі, якія з 12 відаў рэчываў яны ўжывалі дзесяць ці больш разоў і ў якім узросце ўпершыню іх паспрабавалі. У спісе — нікацін, алкаголь, канабіс, какаін, апіоіды, стымулятары, рэцэптурныя абязбольвальныя, галюцынагены, анестэтыкі, транквілізатары, інгалянты і «іншае».
У апытанне таксама ўключылі пункты для ацэнкі працягласці і сілы залежнасці. Акрамя таго, рэспандэнтаў спыталі пра колькасць спробаў кінуць і статус ужывання на момант даследавання. У наступным аналізе разгледзелі вынікі тых, хто паведаміў пра ўстойлівую адмове як мінімум ад аднаго з пералічаных рэчываў.
Даследаванне паказала, што з рэцыдывамі часцей за ўсё сутыкаліся людзі, якія ўжываюць апіоіды і абязбольвальныя лекі. Адпаведна, гэтыя тыпы залежнасці навукоўцы прызналі самымі ўстойлівымі і цяжкапераможнымі.
Алкаголь і стымулятары абагналі канабіс, какаін, галюцынагены і нікацін па колькасці спробаў адмовіцца са зрывамі. Таксама высветлілася, што ў выпадку з галюцынагенамі, якія маюць іншыя клінічныя ўласцівасці ў параўнанні з астатнімі рэчывамі са спісу, апытаным патрабавалася менш спробаў для ўстойлівага ўстрымання. Па гэтым крытэры транквілізатары накшталт феназепаму і ларазепаму істотна апярэдзілі галюцынагены, да якіх адносяць псілацыбін і ЛСД.
У цэлым для псіхаактыўных рэчываў з павышанай частатой рэцыдываў была характэрная больш выяўленая фізічная залежнасць з цяжкімі праявамі сіндрому адмены ў выглядзе болю, млоснасці і трывожнасці. Аналіз пацвердзіў, што людзям, якія даўно і моцна прыахвоціліся да такіх рэчываў, для перамогі над згубнай звычкай могуць спатрэбіцца шматразовыя спробы.
Даследчыкі выказалі надзею, што дадзеныя іх працы будуць карысныя не толькі дактарам-нарколагам, але і пацыентам, бо гэтыя веды здольныя падтрымаць настрой на пераадоленне залежнасці, нягледзячы на магчымыя няўдачы.
Чытайце таксама
